संवाददाता 
काठमाडौं । इन्स्योरेन्स इन्स्टिच्युट अफ नेपाल (आईआईएन) ले बीमा सर्भेयरका लागि आधारभूत तालिम कार्यक्रम आयोजना गर्ने भएको छ। आईआईएनका अनुसार, उक्त तालिममा घर, सम्पत्ति, व्यवसाय तथा इञ्जिनीयरिङ बीमा, मोटर बीमा, परिवहन बीमा र हवाई बीमासम्बन्धी बीमा सर्भेयर तालिम प्रदान गरिनेछ।
तालिममा सहभागी हुन बीमा नियमावली, २०८१ अनुसार बीमा सर्भेयर बन्ने योग्यता हासिल गरेको हुनु अनिवार्य गरिएको छ। आईआईएनले जनाएको छ कि तालिममा भाग लिन इच्छुकहरूले इञ्जिनीयरिङ विषयमा कम्तीमा स्नातक उपाधि हासिल गरेको, चार्टर्ड एकाउन्टेन्ट परीक्षा उत्तीर्ण गरेको, स्नातक उपाधि प्राप्त गरी कुनै निर्जीवन, लघु-निर्जीवन वा पुनर्बीमा कम्पनी वा नेपाल बीमा प्राधिकरणमा कम्तीमा १० वर्ष अधिकृतस्तरमा काम गरेको वा अन्तर्राष्ट्रिय रुपमा मान्य बीमा सम्बन्धी संस्थाबाट निर्जीवन बीमामा एसोसिएटसीप वा सो सरहको उपाधि हासिल गरेको हुनु पर्नेछ।
आवेदन दिनका लागि यही २०८२ साल वैशाख १९ गतेसम्म समय दिइएको छ। आवेदनहरू प्रथम प्राथमिकताको आधारमा छनोट गरिने र प्रत्येक समूहमा ३० जनासम्म सहभागी राखी तालिम सञ्चालन गरिने आईआईएनले जानकारी दिएको छ।
